Составьте согласныя песни,
Взыграйте с чинми безсловесных.
Человеков собор весь,
Зряще чудеси чудес
Со страхом, со страхом.
Ликуйте сердцем и душами,
Прославьте Бога всех устнами,
Во многую благодать
Юже изволил подать —
Прияхом, прияхом.
Благости безмерна пучина,
Послал в мир Сопрестольна Сына,
Восхотевшаго понесть
Плоть нашу, яко Сам весть
Небесный, небесный.
Сего ради из пречиста чрева
Раждает Нетленная Дева,
Сошедше в Вифлеем,
В вертепе вселися в нем,
Претеснем, претеснем.
О Христе, где еси родился?
Ах, как там премного смирился!
Ясли Тебе суть одром,
Тщатся Тебе вол с ослом
Согрети, согрети.
Ангелами немолчно Хвалимый,
Пастырьми днесь странно чудимый:
Им же Его обрести,
Ангел яве возвести,
Пелены, пелены.
Троица царей путь приходит,
Звезда тех ко Христу приводит.
Цари Царю предстоят,
Поклон Ему отдают
Почтенный, почтенный.
Несут злато и ливан и смирну
Спасу всех, Господу предивну.
Он же на дары те зря,
Лебезно от них прия —
Спасет, спасет.
Ирод ждет вести от персидов,
Не прият, готовит убийцев;
Вифлеемских чад побить,
За Христа их погубить,
Рыкает, рыкает.
Но Христос спасеся от лову,
Иосифу велит быти готову,
Велит Ангел Мать с Ним взять,
И в Египет убежать,
Оттуда, оттуда.
Тамо же от вопля колики,
Слышатся коль зельные крики,
Ссецаемых отрочат,
Матерей плач ради чад,
Повсюду, повсюду.
За Христа умирают дети,
Убо мы потщимся воспети.
Христово есть Рожество,
Великое торжество,
Дни славны, дни славны.
Сей бо есть Истинный Мессия,
Сего тако родила Мария,
Яко пророк предсказал,
Исаия провещал
Издавна, издавна.
Рождеися от Девы Владыка,
Приемля песнь человеча лика:
Поем бо Твой к нам приход,
Спасающий весь наш род,
Весь верный, весь верный.
Христе Боже, препрославлен буди,
С Рождьшею Тебе рцем вси люди:
Сущий Бог и человек,
Господствуя в век и в век,
И ныне, и ныне.