Источник: Материалы к истории и изучению русского сектантства и раскола /Materiaux pour servir a l`histoire des sectes russes/ : в 5 вып. / под ред. Бонч-Бруевича В. — СПб.: Тип. Б. М. Вольфа, 1908. — Т. 1. Баптисты. Бегуны. Духоборцы. Л. Толстой о скопчестве. Павловцы. Поморцы. Старообрядцы. Скопцы. Штундисты. — С. 295.
Терн острейший жалости душу ми збодает,
рыдати же не могу, глас бо мой престает,
Отец дивный Симион мене отлучися,
философ преизящный в небо преселися!
И что ми горчайшее толикия раны
многих ради моих грех от Господа даны?
Плачется ныне пустыня, реки слез точащи,
лютое сие жало в сердце си держащи.
Ах, и горе мне, бедной, в горести вещает,
что ми и откуда толь горко бывает:
его же имех себе крепкую ограду,
той от мене внезапу взят бысть к вышню граду;
о нем же всегда бывах преславно спасена,
сего ныне за грехи явихся лишена.
Умны уже плачевны по отце слагаю,
мечтающе здравого, к Господу вещаю:
едине безсмертный царю, вечная державо,
отца нашего покой, служивша ти право;
небесную даждь ему за труды столицу,
ездевшу добродетель, аки колесницу.
Инам, братие, горе, отца неимущим!
Кто будет нам толик вождь тако слепым сущим?
Ох, великия сея беды и напасти!
Земля скры свет наш сладкий! О горкия страсти!
Мали разумом есмы, и кто нас наставит,
ах, нашего бедствия кто путь наш исправит?
Скорби нас толикия всегда окружают,
корабль самым жительства волны сокрушают;
око наше отъятся, солнице помрачися,
радость и веселие в печаль претворися.
Бога свет грехми прогневал: казнит нас бедами.
Имамы враг тысящу, и всяко зло с нами;
тмы ругателей на нас день и нощь воюют,
онемехом без отца и вси нас заплюют.
Тем же прибегаем вкупе к единому Богу,
желательно ввержемся в милость его многу.
Аще и зле падохом, но леть есть востати;
люты суть врази наши, но Бог с нами в рати;
отец Симион за нас в небе заступает:
сего ради кийждо нас тщалив да бывает.
Ты же нам, о блаженне, буди помогая
и духом премудрости чада си питая.
Сам, отче, назирати стадо си потщися,
егда призывае(м) тя, помощник явися.
Расторгни сплетенныя врагов наших сети,
да возможем в тишине Бога присно пети,
царество нам небесное потщися просити,
ангельского же царя о мире молити.